Anna Halldóra Ágústsdóttir og Guðmundur Óli Steingrímsson voru í vikunni útnefnd íþróttamaður og íþróttakona Völsungs á Húsavík fyrir árið 2017.
Anna Halldóra skaust upp á stjörnuhimininn í haust með mögnuðum árangri í Amsterdammaraþoni sem var jafnframt hennar fyrsta maraþon. Anna Halldóra hljóp kílómetrana 42,2 á tímanum 3:16:31 sem reyndist næstbesti árangur íslenskra kvenna á árinu.
Árangurinn dugði Önnu Halldóru einnig til þess að komast á lista yfir 25 bestu tímana hjá íslenskum hlaupakonum í maraþoni frá upphafi. Anna Halldóra hefur lagt mikið á sig á árinu, en hún hefur hlaupið um 4000 km á árinu, allt utandyra í öllum mögulegum veðrum.
Guðmundur Óli gekk til liðs við Völsung í vor eftir nokkurra ára fjarveru þar sem hann lék með Akureyrarliðunum KA og Þór. Guðmundur Óli fékk einnig viðurkenningu fyrir að hafa leikið yfir 100 leiki með meistaraflokki Völsungs.