Bretinn Adam Peaty varð í dag fyrsti maður sögunnar til að synda 100 metra bringusund á undir 57 sekúndum. Hann kom þá fyrstur í mark í úrslitasundinu á heimsmeistaramótinu í 50 m laug í Gwangju í Suður-Kóreu á 56,88 sekúndum.
Hann bætti í leiðinni eigið heimsmet frá því á EM í fyrra sem var 57,10 sekúndur. Peaty kom í mark tæpum tveimur sekúndum á undan Yan Zibei frá Kína sem varð annar. James Wilby frá Bretlandi varð þriðji.
„Þetta er ótrúlegt. Ég er búinn að eltast við þetta í þrjú ár, eða síðan á Ólympíuleikunum í Ríó árið 2016," sagði Peaty eftir sundið. Óhætt er að segja að Peaty sé með fáheyrða yfirburði í greininni. Hann á 16 bestu tíma sögunnar og hefur synt 1,4 sekúndum hraðar en nokkur maður.