Norska kvennalandsliðið í handknattleik, undir stjórn Þóris Hergeirssonar, setti met í kvöld þegar liðið vann fjórða örugga sigur sinn í jafnmörgum leikjum á heimsmeistaramótinu sem fram fer í Þýskalandi. Í kvöld var það Tékkland sem lenti í klóm þeirra norsku, en lokatölur urðu 34:16.
Þetta var 29. leikur Noregs í röð án þess að tapa, en tvívegis áður hafði liðið unnið 28 leiki í röð. Fyrst 2004-2005 og aftur 2008-2009. Noregur tapaði síðast fyrir Rússlandi í undanúrslitum Ólympíuleikanna 2016.
Noregur var með 13 marka forskot strax í hálfleik, 20:7, og gaf lítið eftir í síðari hálfleik. Þegar yfir lauk munaði 18 mörkum og lokatölur eins og áður segir 34:16. Nora Mörk var markahæst hjá Noregi með 7 mörk og þær Stine Hoftedal og Veronica Kristiansen skoruðu báðar 6 mörk.
Noregur, sem er ríkjandi heimsmeistari, var þegar kominn áfram upp úr riðlinum eftir að hafa unnið þrjá fyrstu leikina til þessa á afar sannfærandi hátt, 30:22 gegn Ungverjalandi, 36:21 gegn Argentínu og 35:20 gegn Póllandi.