NDR-ljósvakamiðill í Þýskalandi hefur eftir Aron Pálmarssyni, landsliðsmanni í handknattleik, á vefsíðu sinni að Aron skilji ekki hvers vegna mótshald HM í Egyptalandi í janúar sé enn á áætlun þrátt fyrir heimsfaraldur.
Umfangsmikið mótshald er fyrirsjáanlegt á HM en þá mætir 31 þjóð til Egyptalands með leikmenn, þjálfara og fylgdarlið. Ásamt heimamönnum leika 32 lið á mótinu.
Í umfjöllun NDR er vísað í ummæli nokkurra leikmanna í hinum og þessum fjölmiðlum en framsetningin er eins og NDR hafi haft samband við Aron. Eru tvær setningar hafðar eftir honum: „Mótinu ætti að aflýsa. Ég skil ekki hvers vegna verið sé að fljúga með okkur eitthvað í þessum aðstæðum til að láta okkur spila.“
Aðrir leikmenn sem vitnað er í lýsa einnig áhyggjum sínum af stöðunni.