Sögunni um hvort Paolo Guerrero, fyrirliði Perú, fái að vera með á HM í fótbolta í Rússlandi eður ei er loks lokið eftir að Alþjóðaíþróttadómstóllinn, CAS, lengdi bann hans upp í 14 mánuði þar sem hann féll á lyfjaprófi. Hann missir því af lokakeppninni.
Guerrero var upprunalega úrskurðaður í 12 mánaða bann þar sem efnið benzóýlekgonin, umbrotsefni kókaíns, fannst í líkama hans í lyfjaprófi eftir markalaust jafntefli við Argentínu í byrjun október.
Bannið var stytt um helming eftir að hann áfrýjaði úrskurðinum. Alþjóðlega lyfjaeftirlitið, WADA, áfrýjaði hins vegar þeirri ákvörðun og nú hefur 14 mánaða bann hans verið staðfest og því verður ekki breytt.
Guerrero segist ekkert rangt hafa gert og í málsvörn héldu lögfræðingar hans því fram að bannaða efnið hefði hann fengið í líkamann vegna tedrykkju.