„Messi sýndi að hann er mannlegur og við munum halda áfram að styðja við bakið á honum," sagði Sergio Agüero, framherji argentínska landsliðsins í fótbolta, í samtali við ESPN eftir 1:1-jafnteflið við Ísland í fyrsta leik þjóðanna á HM í Rússlandi í dag.
Lionel Messi, stjarna argentínska liðsins, var langt frá sínu besta í dag og varði Hannes Þór Halldórsson m.a. vítaspyrnu frá honum.
„Vonandi verður hann betri í næsta leik á móti Króatíu. Fyrsti leikurinn er alltaf sá erfiðasti því allir vilja mæta okkur,“ sagði Agüero. Hann segir íslenska liðið hafa fagnað eins og það hafi unnið í leikslok.
„Þeir vörðust mikið og voru bara líklegir til að skora úr föstum leikatriðum. Þeir fögnuðu eins og þeir hefðu unnið leikinn,“ sagði hann að lokum.