Þýski dómarinn Daniel Siebert er ekki vinsæll hjá úrúgvæsku þjóðinni eftir að landsliðið féll úr leik á HM í Katar í dag, þrátt fyrir 2:0-sigur á Gana. Úrúgvæ þurfti eitt mark í viðbót, til að vera með betri markatölu en Suður-Kórea.
Siebert dæmdi umdeilda vítaspyrnu í fyrri hálfleik, sem Úrúgvæjar voru allt annað en sáttir með. Federico Valverde, leikmaður Real Madrid, fagnaði framan í dómarann þegar Sergio Rochet varði vítið frá André Ayew.
Þá vildu leikmenn Úrúgvæ fá tvær vítaspyrnur í seinni hálfleik, en þá sagði Siebert nei.
Leikmenn Úrúgvæja eltu Þjóðverjann af vellinum í gær og voru með ógnandi tilburði í garð hans. Edinson Cavani og José Giménez fengu báðir gult spjald fyrir mótmæli, eftir að Siebert flautaði leikinn af.
Myndband af Valverde fagna af innlifun framan í dómarann má sjá hér fyrir neðan.
EL HALCÓN pic.twitter.com/b2Pr9lA485
— Out of context Futbol Uruguayo (@OOCfutUY) December 2, 2022