Pólski sleggjukastarinn Wojciech Nowicki er ólympíumeistari eftir að hafa náð sínum besta persónulega árangri í úrslitum karla í greininni á Ólympíuleikunum í Tókýó í dag.
Nowicki kastaði lengst 82,52 metra, tæpum metra lengra en lengsta kast Norðmannsins Eivinds Henriksens, sem kastaði 81,58 metra og náði í silfurverðlaun.
Landi Nowickis, Pawel Fajdek, lenti í þriðja sæti með því að kasta sleggjunni lengst 81,53 metra og tryggði sér þannig bronsverðlaunin.
Nowicki hafði áður komist á verðlaunapall á Ólympíuleikum, en hann vann til bronsverðlauna í greininni á leikunum í Ríó í Brasilíu árið 2016.
Árið 2018 varð hann svo Evrópumeistari í greininni.