Viðskipti | mbl | 15.10.2014 | 10:13 | Uppfært 11:15

Hafna ásökunum um samráð

Gylfi Sigfússon, forstjóri Eimskips, er á meðal þeirra sem kærðir voru til Sérstaks saksóknara Eggert Jóhannesson

Eimskipafélag Íslands hafnar því með öllu að hafa gerst brotlegt við ákvæði samkeppnislaga og segir í tilkynningu að félagið hafi ekki kæru undir höndum og geti því hvorki upplýst um efni hennar né að hvaða einstaklingum hún beinist.

Í kvöldfréttum Ríkisútvarpsins í gær kom fram að Samkeppniseftirlitið hefur kært ellefu starfsmenn Eimskips og Samskipa til embættis Sérstaks saksóknara vegna gruns um að félögin hafi um árabil haft með sér ólöglegt samráð. „Ljóst má vera af umfjöllun RÚV að fjölmiðillinn er með mun ítarlegri upplýsingar um rannsókn málsins en félagið sjálft,“ segir í tilkynningu.

Eimskipafélagið tilkynnti þann 10. september 2013 að Samkeppniseftirlitið hefði hafið rannsókn á félaginu og kallað eftir gögnum en í tilkynningu segir að félagið hafi ítrekað óskað eftir upplýsingum um hin meintu brot á samkeppnislögum og hafi af því tilefni kært ákvarðanir Samkeppniseftirlitsins í tvígang til Áfrýjunarnefndar samkeppnismála.

Þann 30. september sl. tilkynnti félagið að Áfrýjunarnefnd samkeppnismála hefði fellt úr gildi ákvörðun Samkeppniseftirlitsins frá 3. júní sl. að hluta og lagt fyrir eftirlitið að afhenda félaginu umbeðin gögn innan tveggja vikna. „Félaginu bárust gögnin þann 8. október sl. og vörpuðu þau ekki frekara ljósi á grundvöll málsins.“

Í frétt RÚV kom fram að Gylfi Sigfússon, forstjóri Eimskips, og Ásbjörn Gíslason, fyrrverandi forstjóri Samskipa, sem nú stýrir Samskip Logistic í Hollandi og Pálmar Óli Magnússon, núverandi forstjóri Samskipa, séu meðal þeirra sem kærðir hafa verið vegna málsins.

Tveir þriðju allra flutninga á landinu eru vegum fyrrnefndra félaga og er meirihluti allrar neysluvöru sem hingað er flutt til lands á þeirra vegum.

Frétt mbl.is: Ellefu kærðir vegna gruns um samráð