Rekstrarhagnaður Landsnets á síðasta ári fyrir fjármagnsliði nam 49,7 milljónum Bandaríkjadala eða 5.999,4 milljónum króna samanborið við 56,8 milljónir Bandaríkjadala eða 6.855,9 milljónir króna árið áður. Lækkunin er um 856,5 milljónir króna á milli ára og skýrist aðallega af hækkun afskrifta.
Þetta kemur fram í tilkynningu Landsnets.
Tap samkvæmt rekstrarreikningi nam 13 milljónum Bandaríkjadala eða 1.564,7 milljónum króna á árinu 2016 samanborið við 30,4 milljónir Bandaríkjadala eða 3.669,8 milljóna króna hagnað á árinu 2015.
„Unnið var að endurfjármögnun félagsins á árinu þar sem fjármögnun félagsins var að miklu leyti breytt yfir í bandaríkjadal í samræmi við nýjan starfrækslugjaldmiðil félagsins. Gefin voru út skuldabréf, 200 milljónir Bandaríkjadala, í lokuðu skuldabréfaútboði í Bandaríkjunum í desember 2016. Greitt var inn á verðtryggt krónulán frá stærsta eiganda félagsins og eftirstöðum skuldbreytt í bandaríkjadali. Í árslok var um 80% af fjármögnun félagsins komin yfir í bandaríkjadali samkvæmt stefnu stjórnar,“ segir í tilkynningu Landsnets.
Þá var lausafjárstaða félagsins sterk, en handbært fé í lok árs nam 18,3 milljónum Bandaríkjadala eða 2.202,6 milljónum króna og handbært fé frá rekstri á árinu nam 52,4 milljónum Bandaríkjadala eða 6.322,6 milljónum króna.
Í byrjun árs 2016 var starfrækslugjaldmiðli Landsnets breytt og er þetta því fyrsta árið sem fyrirtækið er gert upp í bandarískum dal. Fjármögnun félagsins var að mestu leiti í íslenskum krónum og því var niðurstaða ársins Landsneti óhagstæð vegna mikillar styrkingar krónunnar.
„Á árinu var unnið að endurfjármögnun fyrirtækisins og náðist stór áfangi í þeim efnum í lok árs þegar fyrirtækið gaf út 200 milljónir Bandaríkjadala skuldabréf í lokuðu skuldabréfaútboði fyrir fagfjárfesta í Bandaríkjunum,“ segir í tilkynningunni.
Guðmundur Ingi Ásmundsson forstjóri Landsnets segir að með breyttri fjármögnun fyrirtækisins hafi verið dregið úr gengisáhættu og hagstæðari vaxtakjör náðust. Með þeim breytingum sem gerðar voru á fjármögnun félagsins hefur gengisáhættan minnkað verulega og fjármagnskostnaður fyrirtækisins lækkaður sem mun koma neytendum til góða í framtíðinni.
„Það er jákvætt að sjá að rekstrarhagnaður fyrir fjármagnsliði og afskriftir er góður og í takt við áætlanir. Rekstur Landsnets stendur á mjög traustum grunni og má nær eingöngu skýra tap fyrirtækisins með styrkingu krónunnar á árinu og áhrif þess á fjármagnskostnað. Fyrirtækið var áður með um 80% af fjármögnun sinni bundna í stofnlán frá stærsta eigandanum og var lánið verðtryggt í íslenskum krónum án afborgunarheimildar til ársins 2020. Á árinu áttu sér stað viðræðum við lánveitendur og var stórt skref stigið þegar samningar náðust um innborgun inn á stofnlánið og skuldbreytingu eftirstöðva þess í árslok 2016.Breytt fjármögnun skilar okkur hagstæðari kjörum auk þess sem dregið er úr gengisáhættu,“ er haft eftir Guðmundi.