„Þetta er ekkert viðkvæmt gagnvart Isavia heldur kveða samkeppnislög á um að fjárhagsupplýsingum megi ekki deila milli fyrirtækja í samkeppni,“ segir Guðni Sigurðsson, upplýsingafulltrúi Isavia, um lagadeilu ríkisfyrirtækisins við Kaffitár.
Greint hefur verið frá því að stjórnendur Kaffitárs hafi aftur kært Isavia til úrskurðarnefndar um upplýsingamál vegna synjunar ríkisfyrirtækisins á að afhenda gögn um forval fyrirtækisins vegna útleigu á veitingarými í Leifsstöð sem lauk í september 2014. Kaffitár óskar meðal annars eftir því að fá aðgang að upplýsingum sem Isavia hafði sérstaklega strikað yfir.
Guðni segir að fyrirkomulag útboðsins hafi verið þannig að raunhæfasta tilboðið hafi verið valið, ekki endilega hæsta tilboðið. Það hafi krafist nákvæmra og viðkvæmra gagna, meðal annars ýtarlegra fjárhagsupplýsinga og viðskiptaáætlana.
„Við afhentum gögnin í fyrra og síðan biður Kaffitár um fleiri gögn. Þá afhendum við öll gögn, gengum lengra en upplýsingalög kveða á um, nema með yfirstrikunum yfir þessar viðkvæmu upplýsingar.“