Kosningu vegna kjarasamnings Flugvirkjafélags Íslands og Samtaka atvinnulífsins, fyrir hönd Icelandair, lauk kl. 12 í dag. Fram kemur á vef flugvirkjafélagsins að samningurinn hafi verið samþykktur.
Samningar í kjaradeilu flugvirkja hjá Icelandair og viðsemjenda þeirra náðust aðfaranótt 19. desember, en verkfall hafði þá staðið í 46 klukkustundir, en það hófst kl. 6 að morgni 17. desember.
Verkfallið stóð sunnudag og mánudag og á þeim tíma voru alls 122 ferðir á uppsettri áætlun Icelandair. Alls 64 þeirra ferða þurfti að fella niður og náði það til þúsunda flugfarþega, sem ýmist fengu far með öðrum félögum, breyttu áætlunum sínum eða fengu farmiða sinn endurgreiddan.