Viðskipti | mbl | 31.8.2019 | 20:34 | Uppfært 1.9.2019 0:59

4.800 gestir á fyrstu tveimur tímunum

Mikill fjöldi fólks lagði leið sína í Víkingsheimilið í dag til að versla á markaðnum. mbl.is/Eggert Jóhannesson

„Markaðurinn er búinn að fara langt fram út væntingum,“ segir Olga Helena Ólafsdóttir, verslunareigandi og einn helsti skipuleggjandi haustmarkaðarins Haust Pop-up! Markaðurinn hófst í Víkingsheimilinu í dag. Hann verður aftur opinn frá ellefu til fimm á morgun.

Rúmlega 4.800 manns mættu á fyrstu tveimur tímunum og í heildina mældist gestafjöldinn tólf til þrettán þúsund. „Það var gott streymi í allan dag, ekkert smá margir. Oftast er mest í byrjun og fram að hádegi en það var meira að segja alveg pakkað undir lokin,“ segir Olga.

Skipuleggjendur markaðarins frá vinstri, Eyrún Anna Tryggvadóttirm Olga Helena Ólafsdóttir og Sara Björk Purkhús. mbl.is/Eggert Jóhannesson

Markaðurinn er líklega stærsti markaðurinn sem Olga hefur staðið fyrir en hún byrjaði ásamt fleirum að halda markaði fyrir netverslanir um jólin 2017. Þá voru verslanirnar 12 en í þetta skiptið eru þær rúmlega 70 talsins. Á síðasta markað mættu um 20.000 manns.

Frétt af mbl.is

Markaður netverslana sexfaldast

Spurð hvort vörurnar séu ekki að klárast segir Olga: „Fólk er með lager og er að fylla á þannig að það er alltaf gott streymi. Við erum búin að þurfa að keyra nokkrum sinnum upp á lagerinn okkar á Nýbýlavegi til að fylla á birgðirnar af því að ákveðnir vöruflokkar hafa klárast.“

Eitthvað fyrir alla

Íbúar Latabæjar kíktu í heimsókn klukkan eitt í dag. „Þau slógu í gegn hjá börnunum. Það voru extra margir hérna þá sem voru að fylgjast með þeim.“

Olga segir fjölbreytnina aldrei hafa verið meiri. „Það er eitthvað fyrir alla á básunum hérna enda hefur aldrei verið svona fjölbreytt úrval hjá okkur.“