Ryanair hækkar hagnaðarspá

Írska flugfélagið Ryanair hefur hækkað hagnaðarspá fyrir rekstrarárið vegna mikillar sölu á flugmiðum í kringum hátíðirnar og góðrar bókunarstöðu á fjórða fjórðungi rekstrarársins.

Spáin nú gerir ráð fyrir því að hagnaður Ryanair nemi 950 milljónum til 1,05 milljörðum evra, sem svarar til 131-145 milljarða króna, á yfirstandandi rekstrarári sem lýkur í lok mars. Fyrri spá hljóðaði upp á 800-900 milljóna evra hagnað. Þetta kemur fram í tilkynningu Ryanair í dag.

Þar kemur fram að saman fari mikil sala á flugmiðum í kringum jól og áramót og góð bókunarstaða út rekstrarárið. Aftur á móti sé staðan ekki góð hjá Laudamotion, flugfélagi í eigu Ryanair í Austurríki. Þar sé gert ráð fyrir taprekstri en það megi rekja til lækkunar á verði flugfargjalda vegna harðrar samkeppni, einkum frá þýska flugfélaginu Lufthansa.

Gert er ráð fyrir að Ryanair birti afkomutölur fyrir þriðja ársfjórðung 3. febrúar.

• Blogga um frétt