Fyrsta skóflustungan að nýrri verslun Krónunnar á Akureyri var tekin í dag í björtu veðri á svokölluðum Hvannavallareit og er áætlað að hún verði opnuð síðla árs 2022.
Verslunin er rúmir 2.000 fermetrar að stærð og verður fyrsti áfangi framkvæmdarinnar í höndum Lækjarsels ehf. á Akureyri.
„Þetta er langþráður draumur sem er að rætast,“ segir Ásta S. Fjeldsted, framkvæmdastjóri Krónunnar, sem tók fyrstu skóflustunguna ásamt Eggerti Þór Kristóferssyni, forstjóra Festar.
Verslunin verður með stærstu Krónuverslununum hér á landi og sú fyrsta sem rís á Norðurlandi. Akureyringar taka þessum áformum með eindæmum vel:
„Þetta er gríðarlega stórt tækifæri fyrir okkur til þess að auka þjónustuna á þessu svæði. Við finnum á íbúum hér, sem við höfum rekist á, að það er gríðarleg spenna í loftinu þó svo að húsið sé ekki komið upp,“ segir hún. Stemningin á Akureyri sé vel í takt við tíðarandann í Krónunni þar sem gleðin ræður ríkjum beggja vegna.
„Við munum kappkosta að koma að góðu vöruúrvali á sama hagstæða verði og fólk þekkir frá öllum Krónuverslunum,“ segir Ásta í samtali við mbl.is.