Viðskiptavinir flugfélagsins Play þurfa ekki lengur að hafa áhyggjur af flugviskubitinu sem fylgir gjarnan utanlandsferðum en fyrirtækið býður nú upp á lausnir þar sem farþegar geta kolefnisjafnað flugferðir sínar. 

Þær lausnir sem standa til boða eru þörungaræktun sem bindur CO2 úr andrúmsloftinu, framleiðsla á Líf-olíu og skógrækt.

Með þessu vill Play koma til móts við breiðan hóp viðskiptavina sem gerir ólíkar kröfur og hefur mismikið svigrúm við að kolefnisjafna, að því er fram kemur í tilkynningu flugfélagsins.

Hægt er að nálgast frekari upplýsingar um verkefnið hér.

„Það er ekkert leyndarmál að flugi fylgir talsverður útblástur og þess vegna höfum við lagt mikla áherslu á að gera sjálfbærni vegferð okkar gagnsæja, mælanlega og trúverðuga. Ég er sannfærð um að viðskiptavinir muni fagna því að geta loks kolefnisjafnað flug sitt. Við val á samstarfsaðila vorum við með skýrar kröfur um að geta boðið upp á lausnir sem kolefnisjafna með trúverðugum og ábyrgum hætti og hafa raunverulegan loftslags ávinninga í för með sér.

Klimaet, danskt nýsköpunarfyrirtæki, varð fyrir valinu enda uppfyllir fyrirtækið ofangreindar kröfur. Þetta er aðeins eitt af okkar fyrstu skrefum á okkar sjálfbærni vegferð en við erum bara rétt að byrja,“ er haft eftir Rakel Evu Sævarsdóttur, forstöðumanni Sjálfbærni hjá Play.

Tengdar fréttir

Loftslagsvá

Versta vínuppskera í 62 ár

• Gretu Thunberg gert að mæta fyrir dóm
• Áhrif hlýnunar mest í Asíu
• Frítt í strætó fyrir viðskiptavini Krónunnar
• „Þeir hafa ekki alveg verið að standa við sitt“

» Fleiri tengdar fréttir

• Blogga um frétt