Íslenska auðlindafyrirtækið Amaroq Minerals á mikið inni samkvæmt nýju verðmati frá breska fjárfestingabankanum Panmure Gorden.
Fjárfestingabankinn verðmetur félagið í heild á tæplega 239 milljónir dollara, en þar af er Nalunaq náman verðmetin á 110 milljónir dollara. Bréf félagsins eru því verðmetin á 0,91 dollara á hlut, eða 128,95 krónur íslenskar. Bréf félagsins sem skráð eru á First North markað kauphallarinnar voru við lok markaða í gær 80 kr. Verðmatið gefur því til kynna að bréf félagsins séu undirverðlögð um ríflega þriðjung.
Nokkrir óvissuþættir
Panmure bendir á nokkra óvissuþætti sem bæði eru til þess fallnir að hafa neikvæð og jákvæð áhrif á framgang félags. Hve vankannað rannsóknarsvæðið er, er metið félaginu til happs. En þættir á borð andstöðu við námagröft í Grænlandi og hve háð félagið er sveiflum í heimsmarkaðsverði á gulli teljast til neikvæðra óvissuþátta.
Amaroq Minerals var stofnað árið 2017 með það að meginmarkmiði að finna gull og aðra verðmæta málma á Suður-Grænlandi. Fyrirtækið er með leitar- og vinnsluleyfi á tæplega 8.000 ferkílómetra svæði, sem nær yfir tvö þekkt gullbelti á svæðinu. Panmure bendir á að tækifærin leynist ekki aðeins í því að grafa upp gullið heldur geti hlutfallsleg sala námuréttinda einnig reynst arðbær.
Nýskráð á markað
Amaroq Minerals var skráð á First North markað kauphallarinnar þann 1. nóvember síðastliðinn og var gengi fyrsta dags viðskipta 63,5 krónur á hlut. Bréf félagsins ruku svo upp um miðjan nóvember eftir tilkynningu um stóra málmæð.