Ný verksmiðja breytir atvinnuháttum í Súðavík

„Þetta er stórt verkefni, sem hefur ákveðna breytingu í för með sér á atvinnuháttum í sveitarfélaginu, en myndi tryggja stöðu þorpsins. Við tókum meðvitaða ákvörðun 2014 þegar glitti í góðæri að safna fé og fara ekki í framkvæmdir meðan unnið væri að nýjum verkefnum. Það hefur leitt til þess að fjárhagsleg staða okkar er sterk.“

Þetta segir Pétur G. Markan, sveitarstjóri í Súðavíkurhreppi. Kostnaður við hafnarkant, landfyllingu og grjótvarnargarð í Súðavík svo svæðið verði tilbúið til að hefja þar byggingu kalkþörungaverksmiðju er áætlaður hátt í 500 milljónir króna.

Að sögn Péturs má áætla að 280 milljónir færu í hafnarkant sem yrði styrkhæfur af hálfu ríkisins. Það sem eftir stendur kæmi í hlut sveitarfélagsins og segist Pétur reikna með að kostnaður hreppsins gæti orðið 250-300 milljónir króna.

„Í svona stóru verkefni kemur alltaf eitthvað upp á og því finnst mér eðlilegt að miða við hærri töluna til að hafa borð fyrir báru,“ segir Pétur.

Ítarlegri umfjöllun er að finna í Morgunblaðinu í dag.