Yfir þrjú þúsund gámar útbyrðis á nokkrum mánuðum

Gríðarlegur fjöldi gáma hefur tapast á sjó á rúmum þremur mánuðum og allir á Kyrrahafi. Fjöldinn er álíka mikill og tapast á tæplega tveimur og hálfu ári að meðaltali. Þessi atvik eru sjaldgæf, en með aukinni stærð skipa kunna þau að verða umfangsmeiri.

Mikið óveður virðist hafa sett svip sinn á siglingaleiðina milli Bandaríkjanna og Kína yfir Kyrrahaf í vetur og er ekkert smáræði sem flutningaskip hafa tapað af gámum á sjó frá nóvember 2020. Heildarfjöldi er nú kominn í 3.063 gáma sem er 222% fleiri gámar en tapast að meðaltali á ári hverju á heimsvísu.

Þann 30. nóvember í fyrra missti Apus 1.800 gáma útbyrðis. Það eru um það bil jafn margir gámar og Arnarfell og Helgafell, skip Samskipa, geta samanlagt borið. Apus, sem getur borið um 14 þúsund gáma (TEU), var á leið frá Yantian í Kína til Long Beach í Kaliforníu þegar óveður skall á og þurfti í kjölfarið að leggja við bryggju í Kobe í Japan.

Töluvert minna atvik, en stórt þó, átti sér stað 16. janúar síðastliðinn er skipið Essen, sem Maersk gerir út, missti 750 gáma í sjóinn þegar það lenti í miklum öldugangi á norðanverðu Kyrrahafi á leið frá Xiamen í Kína til Los Angeles í Kaliforníu.

Flutningaskip frá Maersk siglir til hafnar í New York. AFP

Stærsta einstaka tilfelli þar sem gámar tapast var 17. júní 2013 er skipið Comfort sökk á indlandshafi og 4.293 gámar fóru í sjóinn. Það er nánast sami fjöldi gáma og nýju skip Eimskips, Dettifoss og Brúarfoss, geta samanlagt borið.

Frétt af mbl.is

Flutningaskip brotnaði í tvennt

Eftir því sem flutningaskipin verða stærri er einnig líklegt að umfang slysa og óhappa verði stærra. Það sást heldur betur þegar umferð um Suez-skurðinn stöðvaðist í kjölfar þess að 220 þúsund tonna og 400 metra langa skipið Ever Given festist. Hins vegar sýnir skýrsla alþjóðasamtaka skipaflutninga (World Shipping Council) frá júlí í fyrra að umfang tapaðra gáma sé ekki stórfellt, aðeins 0,0006% af þeim sem fluttir eru yfir hafið á ári hverju tapast.

Stærsta flutningaskip heims er HMM Algeciras sem rúmar 24 þúsund gáma eða um tólffalt það sem stærstu skip íslensku kaupskipafélaganna geta flutt.

Frétt af mbl.is

Stærsta flutningaskip heims kemur til Evrópu