Icefresh GmbH, dótturfélag Samherja í Þýskalandi, hefur fest kaup á 40% hlut í norska útgerðarfélaginu Eskøy AS, að því er fram kemur í tilkynningu á vef Icefresh. Eskøy er starfrækt í Honningsvåg í Norður-Noregi og gerir út tvö fiskiskip, MS Trygve B og MS Valdimar H, auk nokkurra smærri báta.

Norska félagið var stofnað af íslensku bræðrunum Hrafni og Helga Sigvaldasonum og hefur um árabil verið í samstarfi við Icefresh sem rekur vinnslu í Gross-Gerau sem er rétt suður af Frankfurt am Main í Þýskalandi.

Haft er eftir Hrafni að stefnt sé að frekari stækkun Eskøy og mun aðkoma Icefresh styðja þau áform. Reglugerðir í Noregi gera ráð fyrir að erlent eignarhald í útgerðum megi ekki vera umfram 40% en bræðurnir hafa til þessa farið með 60% eignarhlut í félaginu og Eskøy farið með 40% af eigin hlutum, sem nú verða í eigu Samherja í gegnum þýska dótturfélagið.

Veltan 1,6 milljarðar

Samkvæmt gögnum norsku upplýsingaveitunnar Proff námu rekstrartekjur Eskøy 106,2 milljónum norskra króna, jafnvirði 1,6 milljarða íslenskra króna, á árinu 2019. Þá var eiginfjárhlutfallið einungis 11,5% og námu fjármagnsgjöld rétt rúmum þremur milljónum norskra króna árið 2019, en sá kostnaðarliður nam 1,7 milljónum 2018.

Þá nam hagnaður Eskøy 2,5 milljónum norskra króna árið 2019, jafnvirði 39 milljóna íslenskra króna, en var 4,5 milljónir norskra króna árið á undan.

Samherji hefur áður, í gegnum dótturfélög, fjárfest í Noregi og keypti fyrir um sjö árum 20% hlut í útgerðarfélaginu Nergård sem er meðal stærstu útgerða Noregs.

Frétt af mbl.is

Veltir nálægt 35 milljörðum

Tengdar fréttir

Samherji

Mikilvægt að treysta viðskiptasamböndin

• Söfnuðu mottum og hálfri milljón
• Fengu allir sokka í tilefni mottumars
• Kaldbakur fékk yfirhalningu á Akureyri
• SKE rannsakar Samherja og Síldarvinnsluna

» Fleiri tengdar fréttir

• Blogga um frétt