Landsvirkjun og Laxey gera grænan raforkusamning

Landsvirkjun og Laxey ehf. hafa gert með sér samning um sölu og kaup á endurnýjanlegri raforku til uppbyggingar nýrrar landeldisstöðvar Laxeyjar í Vestmannaeyjum. Um er að ræða hátækni matvælaframleiðslu með afar lágt kolefnisspor.

Þetta kemur fram í fréttatilkynningu Landsvirkjunar en verkefnið verður byggt upp í áföngum á næstu árum og mun hafa náð fullri stærð árið 2030. 

Fyrsti stórnotandi raforku í Vestmanneyjum

Verður Laxey fyrsti stórnotandi raforku í Vestmannaeyjum og mun verkefnið styðja við uppbyggingu flutningsleiða þangað. Gert er ráð fyrir að verkefnið skapi um eða yfir 100 störf.

„Forsenda þess að samningurinn nái fullri stærð er aukin orkuvinnsla Landsvirkjunar en gert er ráð fyrir að Búrfellslundur verði gangsettur síðla árs 2026 og Hvammsvirkjun tveimur árum síðar, 2028,“ segir í tilkynningunni. 

Afhending raforku samkvæmt samningi hefst í apríl 2026 og vex samhliða aukinni framleiðslu. Þegar stöðin verður komin í fullan rekstur verður aflþörfin um 22MW.

• Blogga um frétt