Caryna Galdys Boliver Serge fór nýlega með öðrum zúmba-kennurum frá Reebok Fitness að skoða eldgosið í Geldingadölum. Zúmba-kennararnir tóku upp myndband við nýtt lag frá Ricky Martin sem deildi myndbandi þeirra í sögu á Instagram-síðu sinni.
Caryna er mjög hrifin af eldgosinu og var hún að fara í fjórða sinn þegar hún tók upp myndbandið. Caryna er frá Venesúela en hefur búið á Íslandi í 16 ár og kennir spænsku í Tækniskólanum. Hún er með marga útlenska fylgjendur á Instagram sem fylgjast spenntir með gosferðum hennar á samfélagsmiðlum.
„Ég er líka zúmbakennari hjá Reebok Fitness og finnst gaman að taka upp myndbönd. Mér fannst gaman að blanda saman zúmba og eldgosinu. Ricky Martin var að gefa út nýtt lag í síðustu viku. Hann bað fólk um að senda myndbönd með laginu. Svo valdi hann myndbandið frá eldgosinu,“ segir Caryna.
Ricky Martin er afar vinsæll í zúmba-tímum og gríðarlega vinsæll í hinum spænskumælandi heimi. Caryna segist hafa verið í algjöru sjokki þegar hún áttaði sig á að stjarnan hefði deilt myndbandinu hennar og segir það bara skemmtilegt.
Hér fyrir neðan má sjá myndbandið sem Martin deildi í sögu á Instagram. Erna Rós Sigurjónsdóttir, Edda Sólveig Þórarinsdóttir, Agata Klimowska dansa zúmba í myndbandinu með Carynu.