Það væsir ekki um fyrirsætuna Ásdísi Rán Gunnarsdóttur og Þórð Daníel Þórðarson, en þau hafa undanfarna daga notið lífsins í skíðaferð í bænum Bansko í suðvesturhluta Búlgaríu.

Ásdís Rán og Þórður hafa verið saman frá því sumarið 2023. Þórður er búsettur í Búlgaríu og Ásdís Rán hefur verið með annan fótinn þar lengi. 

Ásdís Rán birti myndaröð frá fríinu á Instagram-síðu sinni, en af myndum að dæma fékk parið gott skíðafæri og gátu því notið alls sem svæðið hefur upp á að bjóða í sól og blíðu.

Á fimm stjörnu lúxushóteli

Í síðustu færslu Ásdísar Ránar merkti hún fimm stjörnu lúxushótelið Premier, en hótelið er staðsett við rætur hins tignarlega Pirin-fjalls sem er vinsælt skíðasvæði. Á hótelinu eru 114 herbergi sem bjóða upp á afslappandi stemningu, ítölsk húsgögn og fallegt útsýni yfir Pirin-fjallið.

Nóttin á hótelinu í lok febrúar kostar allt frá 231 evru, eða sem nemur rúmum 34 þúsund krónum, og upp í 728 evrur, eða tæplega 109 þúsund krónur á gengi dagsins í dag.