Steingrímur er „sannur grínisti"

Hanna Styrmisdóttir ásamt Steingrími Eyfjörð.
Hanna Styrmisdóttir ásamt Steingrími Eyfjörð. mbl.is/ÞÖK
Sýning Steingríms Eyfjörðs á Feneyjatvíæringnum, Lóan er komin, hefur fangað athygli listapenna breska dagblaðsins The Observer, Lauru Cumming.

Cumming segir í úttekt sinni á því merkasta sem fyrir augu ber á Feneyjatvíæringnum að í Steingrími hafi Íslendingar fundið hinn sanna grínista. Grínistinn Eyfjörð hafi ráðfært sig við álf í því skyni að finna falinn "sauða-penna", sem sé að sjálfsögðu tómur. "Sprenghlægileg ævintýraferð í myndum og máli sem ýkir hefðir landsins," segir Cumming um sýningu Steingríms. Hún er augljóslega hrifin af sýningunni þar sem hún minnist á hana í inngangi að greininni, og tvíæringnum almennt, sem hún segir einn þann besta í áratugi.

Feneyjatvíæringurinn er stundum kallaður heimsmeistaramót í myndlist, en þar sýna hvorki fleiri né færri en 800 myndlistarmenn. Verk Steingríms er byggt á viðtölum við um 20 einstaklinga um margvíslega menn og málefni, þ.ám. Benedikt Gröndal, trú á álfa og huldufólk, skák og ýmsa aðra þætti íslenskrar menningar. Það er kafað djúpt í menningararfleifð Íslendinga og margt kemur upp úr kafinu.

Bloggað um fréttina