New England Patriots og Philadelphia Eagles munu eigast við í úrslitum bandaríska fótboltans, Ofurskálinni (e. Super bowl), í kvöld. Um stærsta íþróttaviðburð ársins er að ræða en það sem fer fram í auglýsingahléum og ekki síst í hálfleik vekur yfirleitt meiri athygli meðal áhorfenda.
Í ár mun söngvarinn Justin Timberlake trylla lýðinn í hálfleik, en hann hefur tvisvar áður séð um skemmtiatriði í hálfleik Ofurskálarinnar. Fyrst árið 2001 sem hluti af drengjasveitinni NSYNC og svo árið 2004 ásamt Janet Jackson, en óvænt augnablik þar sem sást í geirvörtu Jackson varð að einu umdeildasta máli Ofurskálarinnar frá upphafi.
Atvikið reyndist einnig kostnaðarsamt, að minnsta kosti fyrir sjónvarpsstöðina CBS sem hafði sjónvarpsréttinn það árið. Stöðin þurfti að greiða 550.000 Bandaríkjadali, eða sem nemur rúmum 55 milljónum króna, í sekt vegna birtingar geirvörtunnar, atviks sem iðulega er minnst sem „Nipplegate“ í bandarískum fjölmiðlum.
Miklar getgátur eru uppi um hvað Timberlake muni gera á sviðinu í kvöld. Munu hann og Jackson gera upp geirvörtumálið fræga á sviðinu eða er jafnvel von á endurkomu drengjabandsins NSYNC? Samkvæmt slúðurmiðlinum TMZ mun hvorugt gerast, en það er aldrei að segja aldrei.
Þetta myndskeið var tekið upp á æfingu poppprinsins á fimmtudag þar sem heyra má alla hans helstu slagara, nýja jafnt sem gamla, þar á meðal „Can´t Stop the Feeling“ og „Cry Me a River“.
Ljóst er að von er á mikilli flugeldasýningu, bókstaflega. Janet Jackson hefur sjálf vísað á bug þeim sögusögnum að hún muni standa á sviðinu. „Til að kveða niður allar getgátur og orðróm um hvort ég muni koma fram á Ofurskálinni á morgun: Það mun ekki gerast,“ sagði Jackson í yfirlýsingu sem hún sendi á PEOPLE í gær.
Hún þakkaði fyrir allan þann stuðning sem henni hefur verið veittur í aðdraganda Ofurskálarinnar, en „geirvörtu-atvikið“ hefur óneitanlega borið á góma vegna endurkomu Timberlake.
Þá kom það einnig fram í fjölmiðlum í vikunni að fjölskylda Jackson hefur ekki fyrirgefið Timberlake gjörðir hans á sviðinu fyrir 14 árum. Faðir Jackson, Joseph, sagði í samtali við New York Post að ef Timberlake væri sannur herramaður myndi hann sjá til þess að hún yrði á sviðinu í kvöld. Janet er hins vegar ekki sömu skoðunar og vill halda sig frá öllu saman. Timberlake hefur einna helst verið gagnýndur af fjölskyldunni fyrir að skella allri skuld á Janet eftir atvikið í stað þess að bera sjálfur ábyrgð á gjörðum sínum.
Timberlake opnaði sig um atvikið í janúar. „Þú getur ekki breytt því sem gerst hefur, en þú getur horft fram á við og lært af því,“ sagði Timberlake í viðtali við Zane Lowe. Þá sagði hann að þau Jackson hefðu gert atvikið upp sín á milli og að samband þeirra væri gott.
Timberlake, sem er nú 36 ára og nýbúinn að gefa út sína fjórðu breiðskífu, „Man of the Woods“, mun stíga á svið í hálfleik í kvöld líkt og fyrr segir. Hvort einhverjar geirvörtur verði frelsaðar á sviðinu verður hins vegar að koma í ljós, en væri það ekki bara hið besta mál, í ljósi allra þeirra byltinga sem hafa riðið yfir heimsbyggðina á þeim fjórtán árum sem liðin eru frá „Nipplegate“?