Til í að prófa eitthvað nýtt

Samkvæmt E-Online er Jennifer Aniston orðin vön því að skilja. Hún tekur verkefnum lífsins um þessar mundir opnum örmum. Er umvafin sínum bestu vinum og nýtur þess að taka sér tíma til að púsla spilum lífsins aftur saman.

Aniston er þekkt fyrir að eiga stóran vinahóp. Á þeim stundum sem hún hefur komið opinberlega fram frá því skilnaður hennar og Justin Theroux var opinberaður í febrúar, hefur hún notið stuðnings vinkonu sinnar Courteney Cox. 

Cox hefur dvalið mörgum stundum í gestaherbergi Aniston og er sannkallaður vinur í raun. Sameiginlegum eignum Aniston og Theroux er nú skipt í bróðerni bak við luktar dyr og virðist ágætlega mikill friður yfir skilnaðinum. Báðir aðilar hafa ákveðið að halda áfram og líta ekki til baka. Aniston líkt og Theroux er sögð tilbúin að kynnast nýju fólki, jafnvel karlmönnum til að mynda langtímasamband með. En hún er sögð vilja fara hægt í sakirnar og kynnast aðilanum vel. Samkvæmt E-Online ætlar hún að fara nýja leið að þessu sinni og prófa að hitta mann úr annarri grein en hún starfar í sjálf.

Fólkið óskar Aniston góðs gengis í lífinu. Hún mun örugglega lenda á fótunum í þetta skiptið eins og henni er einni lagið.

Jennifer Aniston nýtur stuðnings Courtney Cox opinberlega eftir skilnaðinn í febrúar. AFP

• Blogga um frétt