Fyrrverandi forsetar og rjóminn af bandarísku tónlistarfólki kom saman til að kveðja Arethu Franklin, drottningu sálartónlistar, við jarðarför Franklin í heimaborg hennar, Detroit, í dag. Aretha Franklin lést 16. ágúst síðastliðinn, 76 ára að aldri, eftir erfiða baráttu við krabbamein í brisi.
Jarðarförin var meira í líkingu við heiðurstónleika, og það enga smásmíði, en athöfnin í heild sinni stóð yfir í um það bil átta klukkustundir og einkenndist af minningarorðum og söngatriðum á víxl.
Bill Clinton, fyrrverandi forseti Bandaríkjanna, var meðal þeirra sem tóku til máls og sagði hann meðal annars að Franklin hefði unnið hörðum höndum að því að komast á góðan stall í lífinu. „Hún tók guðs gjöf sem varð stærri með hverjum deginum. Það er lykillinn að frelsi. Guð blessi þig Aretha, við elskum þig,“ sagði Clinton.
Bréf fá tveimur fyrrverandi forsetum, George W. Bush og Barack Obama, voru lesin upp við athöfnina og lofuðu þeir hana báðir fyrir framlag hennar til lands og þjóðar.
Tónlistarkonan Ariana Grande flutti lag Franklin, Natural Woman, með glæsibrag og í myndskeiðinu hér að ofan má sjá Clinton dilla sér í sæti sínu á sviðinu á meðan flutningnum stóð. Fjölskylda Franklin er sögð hafa heillast af flutningi Grande tveimur dögum eftir fráfall Franklin og hafi því boðið henni að syngja við jarðarförina.
Þá flutti Jennifer Hudson Amazing Grace og Stevie Wonder og Faith Hill heiðruðu einnig minningu Franklin með tónlistarflutningi.
Kista Franklin var opin við athöfnina og klæddist hún gulllituðum kjól sem glitraði. Franklin var svo borin til hinstu hvílu í hvítum Cadillac LaSalle frá fimmta áratugnum sem kom einnig við sögu í jarðarför föður hennar og baráttukonunnar Rosu Parks.