Harry Bretaprins og Meghan Markle, hertogahjónin af Sussex, munu flytja vistarverur sínar frá Kensington-höll yfir í Windsor-kastala. Flutningarnir eru hluti af undirbúningi hjónanna fyrir fæðingu frumburðarins en þau eiga von á barni í vor.
Hjónin munu búa sér heimili á Frogmore-setrinu og hefjast flutningarnir fljótlega eftir áramót samkvæmt frétt BBC.
Í tilkynningu frá Kensington-höll segir að Windsor eigi sér sérstakan stað í hjörtum hjónanna. Það er því greinilegt að Harry og Meghan líður vel í Windsor-kastalanum og nágrenni hans en brúðkaupsveisla þeirra var einmitt haldin í höfðingjasetri frá 17. öld sem er á svæðinu.