Í dag, 1. október var opnað fyrir innsendingar myndbanda í Jólastjörnuna 2019. Sjónvarp Símans, mbl.is, Góa, Fjarðarkaup og Sena Live standa fyrir þessari söngkeppni fyrir ungra snillinga sem nú er haldin níunda árið í röð. Sigurvegarinn kemur fram í Eldborgarsal Hörpu með aragrúa af stjörnum dagana 21. og 22. desember á stórtónleikunum Jólagestir Björgvins.
Þátttakendur syngja lag að eigin vali og senda okkur hlekk á myndbandsupptöku af söngnum.
Dómnefnd, skipuð þeim Björgvin Halldórssyni, Auði og Birgittu Haukdal, velur þá 12 söngvara sem skara fram úr og verða þeir boðaðir í prufur sem munu skera úr um hver verður Jólastjarnan 2019. Sjónvarp Símans gerir sérstaka þáttaröð um allt ferlið og verða þrír þættir sýndir seinni hluta nóvember og byrjun desember. Í fyrstu tveimur koma keppendurnir tólf í prufur og í þeim þriðja er sigurvegarinn afhjúpaður.
Við biðjum þátttakendur vinsamlegast að fylla út upplýsingar í þar til gerða reiti hér fyrir neðan. Setja þarf meðal annars inn hlekki á myndbönd eða skrár þar sem þátttakendur láta ljós sitt skína.
Eingöngu er tekið við myndböndum sem vistaðar eru á síðunni youtube.com. Keppendur senda þá hlekk á myndbandið í umsókninni og láta leyniorð fylgja ef þess þarf.
Lagaval er algjörlega frjálst, en lagið sem sungið er má vera eftir hvern sem er, af hvaða tegund og tungumáli sem hver og einn vill. Það má vera jólalag en þarf það ekki. Þátttakendur ráða því að auki hvort þeir syngi við undirspil eður ei.
Skráningu lýkur á miðnætti miðvikudaginn 14. október. Tólf krakkar verða í kjölfarið boðaðir í prufur sem fara fram laugardaginn 26. október og sigurvegarinn verður svo afhjúpaður í lokaþætti Jólastjörnunnar hjá Sjónvarpi Símans.
Aldurstakmark: 14 ára og yngri. Þú getur skráð þig HÉR.