Meghan Markle, hertogaynja af Sussex, er farin til Kanada, aðeins örfáum dögum eftir að hafa dvalið þar yfir jólahátíðina með eiginmanni sínum, Harry prinsi, og syni þeirra Archie.
Hertogahjónin komu aftur til Bretlands í byrjun árs og tilkynntu að þau ætli að segja sig frá konunglegum skyldum sínum. Ákvörðunin hefur sett allt í háaloft í Buckingham-höll, breskir fjölmiðlar tala um „Megxit“ og líkja þannig ákvörðun hertogahjónanna við útgöngu Breta úr Evrópusambandinu.
Ákvörðun hjónanna hefur einnig verið líkt við stærsta hneykslismál konungsfjölskyldunnar síðustu öldina þegar Játvarður VIII afsalaði sér krúnunni árið 1936 eftir aðeins 326 daga sem konungur til að hann gæti kvænst bandarísku konunni Wallis Simpson.
Elísabet Englandsdrottning hefur leitað til starfsfólks síns og beðið það að finna lausn á þeirri stöðu sem upp er komin, en Harry og Meghan ráðfærðu sig ekki við neinn áður en yfirlýsingin birtist í fyrradag. Heimildir BBC úr konungshöllinni herma að Elísabet hafi rætt ástandið við föður og bróður Harry, Karl og Vilhjálm.
Nicholas Witchell, konunglegur fréttaritari BBC, segir að drottningin hafi verið í samskiptum við Harry og Meghan í gær og vonaðist hún til að lausn væri í sjónmáli. Síðar fékkst það staðfest að Meghan væri farin til Kanada.
„Við ætlum að draga okkur í hlé sem „háttsettir“ ættingjar konungsfjölskyldunnar og viljum verða fjárhagslega sjálfstæð. Á sama tíma styðjum við að fullu við bakið á hennar hátign, drottningunni,“ sögðu þau í yfirlýsingunni sem Buckingham-höll sendi frá sér. Þar kemur einnig fram að þau hyggjast verja tíma sínum jafnt milli Bretlands og Norður-Ameríku, líklega Kanada.
Í tilkynningu frá konungshöllinni sem kom í kjölfarið segir að ákvörðun hertogahjónanna sé sýndur skilningur en skilji eftir sig flókin úrlausnarefni sem taka muni tíma að vinna úr.
Ákvörðun hjónanna mun ekki hafa áhrif á stöðu Harry sem erfingja krúnunnar, en hann er sjötti í röðinni.