Tónlistarmaðurinn Neil Peart er látinn, 67 ára að aldri. Hann er þekktastur fyrir að vera trommuleikari og textasmiður kanadísku rokksveitarinnar Rush. Peart lést af völdum krabbameins í heila.
Peart, sem lést á þriðjudag í Santa Monica í Kaliforníu í Bandaríkjunum, er talinn vera á meðal bestu rokktrymbla sögunnar.
Neil Peart on the drums, 1970s. Photo by Fin Costello. pic.twitter.com/VGMio04DlM
— Classic Rock In Pics (@crockpics) January 11, 2020
Hann var liðsmaður Rush í 45 ár, en fyrsta plata sveitarinnar leit dagsins ljós árið 1974. Félagar hans greindu frá andlátinu í færslu á Twitter. Þar segir að Peart hafi glímt við meinið í þrjú og hálft ár, að því er segir á vef BBC.
„Með sorg í hjarta og daprir í bragði verðum við að deila þeim hræðilegu tíðindum að sl. þriðjudag beið vinur okkar, sálubróðir og hljómsveitarfélagi til 45 ára, Neil, lægri hlut eftir að hafa háð hetjulega baráttu við krabbamein í heila,“ segir í yfirlýsingu sveitarinnar.