Sýndi óvart heimilisfangið á Instagram og var myrtur

Rapparinn Pop Smoke var myrtur á heimili sínu í Los Angeles í Bandaríkjunum aðfaranótt miðvikudags. Morðið á honum hefur vakið athygli í Bandaríkjunum en fyrr um daginn hafði rapparinn óvart deilt heimilisfangi sínu á Instagram. 

Þegar Pop Smoke sýndi frá rándýrum munum sem hann hafði fengið að gjöf frá fyrirtækjum sýndi hann óafvitandi heimilisfang sitt.

Frétt af mbl.is

Rapparinn Pop Smoke skotinn til bana

Upphaflega var talið að þjófar hefðu brotist inn á heimili hans til að ræna eigum hans og myrt hann í kjölfarið. Eftir nánari skoðun á eftirlitsmyndavélum hefur lögreglan dregið þá ályktun að tilgangur mannanna fjögurra sem brutust inn á heimili hans hafi ekki verið þjófnaður heldur að um skipulagt morð sé að ræða.

Pop Smoke leigði aðeins húsið sem hann var myrtur í en það er í eigu The Real Houswives of Beverly Hills-stjörnunnar Teddi Mellencamp og eiginmanns hennar Edwin Arroyave. Hann var staddur í borg englanna til að kynna tónlist sína.

Honum hafði gengið vel á síðustu mánuðum og átt í árangursríku samstarfi með öðrum þekktum tónlistarmönnum. 

Byggt á umfjöllun TMZ og Vulture um málið.

• Blogga um frétt