Suðurkóreski tónlistarmaðurinn Jaejoong skrifaði í færslu á Instagram, sem hann hefur nú eytt, að hann hafi greinst með kórónuveirusmit í gær, 1. apríl. Jaejoong hefur beðist afsökunar á gríninu.
Tilkynning tónlistarmannsins vakti töluverða athygli á meðal aðdáenda hans og komust fréttirnar í fjölmiðla í gær. Jaejoong er staddur í Japan um þessar mundir og kom meðal annars fram í tónlistarþættinum Utacon 31. mars. Greiningin hefði því haft áhrif á stjórnendur og aðra gesti þáttarins.
Tónlistarmiðillinn Soompi hefur birt þýdda útgáfu af afsökunarbeiðninni.
„Ég er búinn að átta mig á því að þetta er nokkuð sem ég hefði ekki átt að gera. Ég vil fyrst biðjast afsökunar á samfélagsmiðlafærslunni sem ég skrifaði, ég vil fyrst biðja fólk sem þjáist vegna kórónuveirunnar innilega afsökunar og einnig fólkið sem þessi tilkynning hafði áhrif á. Þetta var ekki góð hugmynd hjá mér,“ skrifaði Jaejoong.
Hann greindi einnig frá því að faðir hans þjáðist af lungnakrabbameini og hefði nýlega farið í aðgerð vegna þess. Hann væri því í miklum áhættuhópi.
Síðast en ekki síst biðlar hann til fólks að taka útbreiðslu veirunnar alvarlega og fylgja fyrirmælum til þess að forðast það að smitast.
View this post on InstagramA post shared by J_JUN 김재중 ジェジュン (@jj_1986_jj) on Apr 1, 2020 at 4:41am PDT