Hrönn Sveinsdóttir bíóstjóri er gestur páskaþáttar kvikmyndahlaðvarpsins BÍÓ og ræðir við Þórodd og Helga Snæ um kvikmynd óskarsverðlaunaleikstjórans Bong Joon-ho, The Host. Stökkbreytt sæskrímsli gæðir sér á Suður-Kóreumönnum og hamstrar líka nokkra slíka í holræsakerfi Seúl. Samtalið hófst hins vegar á stöðu mála hjá Bíó Paradís og sagði Hrönn m.a. að kórónuveirufaraldurinn hefði sett enn eitt strikið í reikninginn. Bíóinu var lokað 24. mars vegna samkomubannsins og litlar líkur á því að það verði opnað að nýju, eins og heyra má í hlaðvarpinu. 

The Host er ekki öll þar sem hún er séð, skrímslamynd í anda Godzilla á yfirborðinu en undir niðri ádeila á bandaríska herinn og veru hans í Suður-Kóreu. Í upphafi myndar er gríðarmiklu magni af formaldehýði hellt niður á rannsóknarstofu að fyrirskipan starfsmanns bandaríska hersins. Efnið streymir út í ána Han og myndar þar stærðarinnar skrímsli sem er jafnvígt á láði og legi. „Þetta er ameríski herinn að segja Kóreumönnum hvað þeir eigi að gera og hvað ekki, það er undirtónninn í myndinni. Þetta er risastór ádeila,“ segir Hrönn um The Host. 

Tengdar fréttir

BÍó - Kvikmyndahlaðvarp

Þríhyrningur sigurstranglegur

• Kvennatvenna með spilliefni
• Gerpi í sundi martraðar
• Bond snýr aftur
• Ein merkasta vísindaskáldsagan

» Fleiri tengdar fréttir

• Blogga um frétt