Guy Ritchie gripinn glóðvolgur

Leikstjórinn Guy Ritchie hefur misst ökuleyfið í sex mánuði eftir að hjólreiðamaður tók mynd af honum að skrifa smáskilaboð undir stýri á meðan hann keyrði í gegnum Hyde Park í London. Þá hefur Ritchie einnig verið gert að greiða tæp 700 pund í sekt auk málskostnaðar.

Ritchie hafði áður brotið umferðarlögin en hann var tekinn fyrir hraðakstur í mars 2017 og í febrúar og desember á síðasta ári samkvæmt Evening Standard.

„Ég kom auga á ökumann skrifa skilaboð í símann sinn. Ég nam staðar á meðan ég beið eftir að umferðin létti til. Ég fór svo ökumannsmegin og Ritchie fattar að verið sé að fylgjast með honum. Hann skrúfar niður rúðuna og segir: „Hello my friend“. Ég svara: „Ég held að þú ættir ekki að vera að skrifa á meðan þú keyrir.“ Ritchie keyrir svo í burtu,“ segir í yfirlýsingu hjólreiðamannsins Van Erps. 

• Blogga um frétt