Veröld/Fólk | AFP | 19.5.2021 | 9:40 | Uppfært 10:15

Drottningin syrgir hvolpinn Fergus

Elísabet II Bretadrottning syrgir nú hvolpinn Fergus sem hélt á vit feðra sinna aðeins 5 mánaða gamall. AFP

Elísabet II Bretlandsdrottning syrgir nú hvolpinn Fergus sem hélt á vit feðra sinna nýlega. Fergus var aðeins fimm mánaða gamall. Hvolpinn fékk hún að gjöf á meðan eiginmaður hennar, Filippus hertogi af Edinborg, lá inni á spítala. Filippus lést hinn 9. apríl síðastliðinn.

„Drottningin er algjörlega niðurbrotin. Allir hafa miklar áhyggjur þar sem þetta skeði svo stuttu eftir fráfall eiginmanns hennar,“ sagði heimildamaður The Sun í Windsor-kastala.

Elísabet fékk tvo hvolpa af tegundinni dorgi, þá Muick og Fergus, að gjöf frá syni sínum Andrési í febrúar. Gaf hann henni hvolpana til að gleðja hana á erfiðum tímum. Drottningin hafði fundið huggun í því að fara í göngu með hvolpana tvo flesta daga í hallargörðum Windsor-kastala eftir fráfall Filippusar.

Drottningin er forfallinn aðdáandi corgi- og dorgi-hunda og hefur átt fjölda hunda í gegnum árin. Fergus heitinn nefndi hún eftir frænda sínum Fergus Bowes-Lyon sem lést í fyrri heimsstyrjöldinni.

Muick, sem enn er á lífi, heitir eftir vatni við Balmoral-kastala í Skotlandi. Auk Muicks á hún eldri hund einnig af tegundinni dorgi og heitir hann Candy.