One Direction-stjarnan Liam Payne er hættur með unnustu sinni, fyrirsætunni Mayu Henry sem er 21 árs. Parið byrjaði saman árið 2018 og trúlofaði sig síðasta sumar. Payne sem er 27 ára segist þurfa að vinna í sjálfum sér.
Payne staðfesti sambandsslitin í hlaðvarpsþættinum Diary of a CEO. Hann er þreyttur á því að særa annað fólk. „Það pirrar mig. Ég hef ekki verið góður í samböndum,“ sagði Payne sem þekkir mynstrið sitt núna. Stjarnan fór inn í síðasta samband á slæmum stað. Hann var vandamálið en ekki unnusta hans, hann kunni illa við sig. Í hlaðvarpsþættinum segist hann vera á betri stað nú þegar hann er ekki í sambandinu. Niðurstaðan var best fyrir þau bæði.
Parið fyrrverandi sást fyrst saman í ágúst árið 2018, aðeins nokkrum mánuðum eftir að Payne hætti í sambandi með Cheryl Cole. Payne og Cole eiga soninn Bear sem er fjögurra ára.