Karl Bretaprins hélt áfram að styðja Harry, son sinn, og eiginkonu hans, Meghan Markle, með „dágóðri summu“ eftir að þau sögðu sig frá konunglegum skyldum í upphafi síðasta árs. Þetta kemur fram í ársreikningi prinsins af Wales sem var nýverið birtur. Þar kemur fram að Harry fékk fjármagn frá föður sínum fram á mitt sumar í fyrra.
Harry sagði í viðtali við Opruh Winfrey sem birtist í mars á þessu ári að konungsfjölskyldan hefði slitið á öll fjárhagsleg tengsl á fyrsta ársfjórðungi í fyrra. Líkt og kunnugt er sögðu Harry og Meghan sig frá öllum konunglegum skyldum í upphafi árs 2020 og tók það gildi í byrjun apríl 2020.
Harry og Meghan þvertaka fyrir að hafa sagt ósatt og segja tímalínuna einfaldlega rangtúlkaða. Í viðtalinu hafi Harry átt við fyrsta ársfjórðung fjárhagsárs, það er frá apríl til júlí, og því hafi hann sagt satt og rétt frá.
Konungsfjölskyldan kostaði breska skattgreiðendur 87,5 milljónir punda á síðasta starfsári, eða sem nemur tæpum 15 milljörðum króna, sem er um 18 milljón pundum meira en árið þar á undan.
Samkvæmt ársreikningi Karls Bretaprins greiddi hann 4,5 milljónir punda til Harrys og Meghan á síðasta ári, eða sem nemur um 770 milljónum króna. Greiðslurnar hættu þegar leið á sumarið.
Hvað sem deilum um tímalínu líður eru Harry og Meghan fjárhagslega sjálfstæð í dag og gott betur því hjónin hafa til að mynda gert samninga við Netflix og Spotify fyrir margar milljónir punda.