Eiginmaður fatahönnuðarins Toms Fords, Richard Buckley, er látinn 72 ára að aldri. Buckley var tískublaðamaður en þekktastur fyrir að vera eiginmaður Fords. Buckley lést eftir veikindi á sunnudaginn að því fram kemur í tilkynningu frá Ford á vef Vogue.
„Richard fór friðsamlega á heimili þeirra í Los Angeles í gærkvöldi,“ sagði í tilkynningunni sem var send út í gær. Tom Ford og sonur þeirra Jack voru hjá Buckley þegar hann lést.
Ford sem er sextugur kynntist Buckley á tískusýningu árið 1986. Hjónin gengu loksins í hjónaband árið 2014. Saman eiga þeir einn son sem kom í heiminn árið 2012 með hjálp staðgöngumóður.