Girls-stjarnan Lena Dunham og tónlistarmaðurinn Luis Felber gengu í hjónaband um helgina. Heimildarmenn hafa staðfest við erlenda miðla að brúðkaupið hafi átt sér stað en talsmaður leikkonunnar hefur ekki viljað tjá sig.
Hjónin eru bæði 35 ára en í vor bárust fréttir af sambandi þeirra. Dunham hafði afskrifað karlmenn í upphafi árs. „Þetta hafa verið nokkrir mánuðir. Mér finnst ég heppin,“ sagði Dunham í apríl og kallaði Felber bestu manneskju sem hún hefði hitt.
Dunham hefur lýst Felber sem kraftaverki og er óhrædd að tjá sig um ástina á samfélagsmiðlum. Í júní skrifaði Dunham ástaróð til Felbers á Twitter. Hún sagði hann búa til frábært pasta þegar hún væri veik, horfa á gamla þætti með henni og fara út með hundinn. Þessi orð eru algjör þversögn við fyrri yfirlýsingar hennar en í janúar líkti Dunham karlmönnum við baunarétt. „Það sem ég er að segja krakkar; ekki hætta áður en kraftaverkið verður að veruleika,“ tísti Dunham.