Læknar hafa ráðlagt Elísabetu Bretlandsdrottningu að taka því rólega næstu tvær vikurnar og ekki fara í opinberar heimsóknir á vegum krúnunnar. Drottningin dvaldi eina nótt á sjúkrahúsi í síðustu viku af heilsufarsástæðum.
Á vef BBC segir að drottningin, sem er 95 ára, muni þó sinna einföldum verkefnum líkt og að koma fram á fjarfundum. Þá sé hún staðföst í að taka þátt í minningarathöfn 14. nóvember þegar Bretar minnast þeirra sem tóku þátt í síðari heimsstyrjöldinni.
Drottningin átti að vera viðstödd loftslagsráðstefnu Sameinuðu þjóðanna (COP26) í Glasgow sem hefst á sunnudag en í staðinn mun hún ávarpa ráðstefnuna á upptöku.