Bandaríski spjallþáttastjórnandinn Jay Leno sagði í yfirlýsingu að það sé „allt í lagi“ með hann en fyrr í kvöld var greint frá því að Leno væri á sjúkrahúsi vegna alvarlegra brunasára sem hann hlaut á andliti og höndum.
„Ég fékk alvarleg brunasár er eldur kviknaði í bensíni. Ég Þarf bara viku eða tvær til að komast aftur á fætur,“ sagði Leno.
Talsmaður sjúkrahússins sem Leno er nú á sagði í yfirlýsingu að Leno vilji að allir viti „að ástand hans er stöðugt og verið sé að meðhöndla áverkana“ sem hann fékk í bílskúrnum sínum á laugardag. Leno er mikill bílaáhugamaður og er talið að hann eigi fleiri en 180 farartæki.
„Hann er í góðu skapi og er snortinn vegna allra fyrirspurnanna um ástand sitt og velfarnaðaróska [og] vill láta alla vita að honum vegnar vel.“