Verið er að ná í síðustu tonnin á loðnuvertíð ársins og eru nú Svanur RE, Hoffell SU og grænlenska skipið Tasiilaq á veiðum rétt suður af Malarrifi við sunnanverðan Snæfellsjökul.

Svanur RE-45 mætti á miðin í nótt og segir Hjalti Einarsson skipstjóri um borð að ekki sé mikil loðna á svæðinu. „Það er einhver torfa hérna við botninn. Við bíðum og sjáum hvort þetta komi ekki eitthvað upp.“

Hann segir ekki mikið eftir af kvótanum og að markmiðið sé nú að ná þeim um 600 tonnum sem eftir eru. Spurður hvort reiknað sé með að ná aflanum á næsta sólarhringnum svarar Hjalti: „Ef það gefur færi á sér ætti það nú að hafast“.

Þrátt fyrir hve seint viðbótarkvótinn var gefinn út hefur íslensku skipunum gengið vel að ná öllum þeim rúmlega 329 þúsund tonna kvóta sem úthlutað var. „Vertíðin hefur verið alveg glimrandi fín, bæði veðurfarslega og veiði. Ég held það sé ekki búið að detta út dagur í mars út af veðri,“ segir Hjalti.

Eins og staða skráningar afla er nú á vef Fiskistofu hafa íslensku skipin landað 292.310 tonnum af loðnu.