Stiklað er á stóru um efni árs­skýrsl­unnar á heimasíðu umboðsmanns. Þar er sérstaklega vikið að þeim tilfellum á síðasta ári þegar stjórnvöld hafi ekki farið að tilmælum umboðsmanns. „Óvenju mörg slík tilfelli standa út af borðinu nú eða fjögur, þar sem úrskurðarnefnd umhverfis- og auðlindamála, Þjóðminjasafn Íslands og Ríkissaksóknari eiga hlut að máli. Þegar stjórnvald lýsir sig ósammála tilmælum umboðsmanns, fer ekki að þeim og hlutaðeigandi sættir sig ekki við það þarf að jafnaði að bera þann ágreining undir dómstóla þar sem umboðsmaður hefur ekki réttarskipandi vald,“ segir í umfjöllun.

Þar er jafnframt rakið að algengasta umkvörtunarefnið í fyrra laut að töfum á afgreiðslu mála, þá koma málefni opinberra starfsmanna, mál er lutu að sköttum og gjöldum, aðgangi að gögnum og upplýsingum, almannatryggingum og heilbrigðismálum. Í 9% tilfella leiðréttu stjórnvöld ákvarðanir sínar eftir fyrirspurnir umboðsmanns í fyrra sem er áþekkt hlutfall og árið áður.

Umboðsmaður víkur að uppgjöri og eftirhreytum vegna kórónuveirutímans. Hann hrósar skýrslu nefndar forsætisráðherra frá því í október 2022 sem greina átti áfallastjórnun íslenskra stjórnvalda í faraldrinum en kveðst telja að meira þurfi að gera. „Án þess að gefið sé í skyn að með hinum eða þessum aðgerðum hafi verið gengið of langt eða rangt að verki staðið tel ég því, enn sem fyrr, mikilvægt að þessi tími sé gerður upp, m.a. m.t.t. grunnreglna réttarríkisins, og af því dreginn lærdómur til framtíðar,“ segir Skúli Magnússon umboðsmaður Alþingis.