Við Kvisthaga í Reykjavík er að finna heillandi 124 fm íbúð í fjölbýlishúsi sem reist var árið 1952. Fallegir loftlistar, rúmgóð alrými og sjarmerandi gluggar einkenna eignina sem er á annarri hæð hússins. 

Stílhrein hvít innrétting prýðir eldhúsið sem er bjart og með góðu vinnu- og skápaplássi. Flottur háfur fyrir ofan helluborðið vekur án efa athygli í rýminu, en hann er skemmtilegur í laginu og gefur rýminu karakter. 

Formfagrir stólar prýða bæði borðstofuna og stofuna. Þeir eru mismunandi í laginu en eiga það sameiginlegt að vera með dökka umgjörð og setu eða bak úr ofnum rey sem gefur hlýlegt yfirbragð. 

Háfurinn gefur rýminu skemmtilegan karakter. Ljósmynd/Fasteignaljósmyndun.is

Borðstofan er afar björt og notaleg. Ljósmynd/Fasteignaljósmyndun.is

Formfagrir stólar sem gleðja augað. Ljósmynd/Fasteignaljósmyndun.is

Gluggar og loftlistar setja punktinn yfir i-ið

Í stofunni má sjá stóran og sérlega fallegan glugga sem setur án efa svip sinn á rýmið og hleypir mikilli birtu inn. Við gluggann er svo sannkölluð plöntuparadís sem skapar notalega stemningu og passar vel inn í náttúrulega litapallettu sem flæðir í gegnum rými íbúðarinnar. 

Eignin státar af þremur svefnherbergjum og einu baðherbergi, þar af rúmgóðu hjónaherbergi með útgengi á svalir. Ásett verð er 119 milljónir.

Sjá á fasteignavef mbl.is: Kvisthagi 25

Plönturnar virðast ekki síður hrifnar af fallega glugganum sem prýðir stofuna. Ljósmynd/Fasteignaljósmyndun.is

Skemmtilegar hillur í stofunni. Ljósmynd/Fasteignaljósmyndun.is