Við Stigahlíð í Hlíðunum er að finna 135 fm íbúð á annarri hæð í fjölbýlishúsi sem reist var árið 1956. Íbúðin hefur verið innréttuð á fallegan máta og hefur hvert rými sinn sjarma. 

Í stofunni er margt sem gleður augað. Falleg listaverk prýða veggina og búa til skemmtilegan karakter í rýminu. Ljósir, gráir og svartir tónar eru í forgrunni í rýminu og gefa því stílhreint yfirbragð á meðan ljósbrúnn sófi og grænar plöntur skapa hlýlega stemningu. 

Frá stofunni er gengið inn í borðstofu sem er björt og hlýleg, en þaðan er gengið út á svalir til vesturs. Í eldhúsinu má svo sjá snyrtilega gráa innréttingu, en glæsileg gaseldavél setur þó punktinn yfir i-ið. 

Stofan er björt og rúmgóð, en þar má sjá fallega húsmuni í hverju horni. Ljósmynd/Af fasteignavef mbl.is

Frá stofunni er gengið inn í hlýlega og bjarta borðstofu. Ljósmynd/Af fasteignavef mbl.is

Sköpunarverk heimsþekktra hönnuða

Í íbúðinni leynast víða fallegir hönnunarmunir eftir nokkra af fremstu hönnuði heims. Þar má nefna hinn tímalausa Svan úr smiðju Arne Jacobsen frá árinu 1958 og FLOS 265 veggljósið sem var hannað af arkitektinum Paolo Rizzatto árið 1973 í stofunni. 

Borðstofuna prýða svo stólar úr stólalínu hjónanna Ray og Charles Eames sem voru hannaðir árið 1950. Þar má einnig sjá skemmtilega útfærslu á hinu vinsæla String-hillukerfi sem var hannað árið 1949 af sænsku hjónunum Nisse og Kajsa Strinning. 

Íbúðin státar af fjórum svefnherbergjum og einu baðherbergi. Ásett verð er 94.900.000 kr. 

Sjá á fasteignavef mbl.is: Stigahlíð 2

Stór gaseldavél grípur án efa augað! Ljósmynd/Af fasteignavef mbl.is

Í eldhúsinu er einnig notalegur borðkrókur. Ljósmynd/Af fasteignavef mbl.is