Ali Abdullah Saleh, fyrrverandi forseti Jemens, var myrtur af uppreisnarmönnum húta. Fulltrúi stjórnmálaflokks sem Saleh tilheyrði staðfesti lát hans í samtali við AFP-fréttastofuna.
„Hann var gerður að píslarvotti til varnar lýðveldinu,“ segir Faiqa al-Sayyid, leiðtogi stjórnmálaflokks sem Saleh tilheyrði.
Fyrr í dag var myndband af líki forsetans fyrrverandi birt og fóru þá sögur á kreik um lát hans. Það hefur nú verið staðfest.
Frétt mbl.is: Segja að fyrrverandi forseti hafi verið drepinn
Jemen er á valdi uppreisnarmanna húta í landinu. Saleh var forseti Jemens í 33 ár en var komið frá völdum árið 2012. Hann hefur hingað til verið í bandalagi við uppreisnarmenn húta í borgarastríðinu í Jemen gegn stjórnarher forsetans núverandi sem nýtur stuðnings Sádi-Araba og fleiri bandalagsríkja. Á laugardag tilkynnti Saleh hins vegar að bandalag hans við hútana fyrirfyndist ekki lengur. Átök brutust út og hafa tugir fallið, m.a. í höfuðborginni Sanaa, síðustu daga.
Hútar voru áður svarnir óvinir Salehs en árið 2014 gekk hann til bandalags við þá til að reyna að koma ríkisstjórn landsins frá í eitt skipti fyrir öll.