Kona í Suður-Kína var tengd handtösku sinni svo nánum böndum að hún skreið eftir færibandinu inn í gegnumlýsingarskannann frekar en að láta töskuna úr augsýn.
Myndband sem sýnir skuggamynd konunnar þar sem hún skríður í gegnum skannann á lestarstöð sl. sunnudag, hefur fengið mikla útbreiðslu á kínverskum samfélagsmiðlum.
Í myndbandinu sést konan ferðast með færibandinu og koma svo út úr skannanum hinum megin. Sýnin veldur mikilli undrun hjá farþegum sem þar biðu eftir farangri sínum á lestarstöð í borginni Dongguan.
Myndbandið hefur þegar fengið rúmlega þrjár milljónir áhorfa.
Video: Chinese woman follows handbag into airport X-ray scanner https://t.co/uxbbfa47Zm pic.twitter.com/I16SMJsaCJ
— Hong Kong Free Press (@HongKongFP) February 14, 2018
Yangcheng-kvöldfréttablaðið segir konuna hafa haft áhyggjur af peningunum sem hún var með í töskunni og að þeim yrði stolið á meðan taskan væri í skoðun.
Skannar á borð við þessa eru algengir á samgöngumiðstöðvum í Kína og eru þeir m.a. á nokkrum neðanjarðarlestarstöðvum og rútustöðvum.
Hafa sumir samfélagsmiðlanotendur hæðst að konunni og sagt hana skrýtna að meta peningana meira en eigin heilsu. Myndatökubúnaðurinn sem notaður er til gegnumlýsingar er mjög öflugur og geislarnir í honum skaðlegir heilsu manna.