Lögregla í Bretlandi hefur borið kennsl á yfir 240 vitni í tengslum við rannsókn á morðtilræði á hendur hinum rússneska Sergei Skripal og Juliu dóttur, en hann er fyrrverandi gagnnjósnari. Þá er verið að skoða yfir 200 atriði sem hugsanleg sönnunargögn.
Þetta sagði Amber Rudd, innanríkisráðherra Bretlands eftir fund COBRA-öryggisráðsins í dag. Hún lofsamaði jafnframt fagmennsku lögreglunnar í samtali við blaðamenn. BBC greinir frá.
Taugagas var notað til að reyna að myrða feðginin dóttur hans, en þau liggja nú á gjörgæsludeildd eftir að hafa fundist meðvitundarlaus á bekk í verslunarmiðstöð í Salisbury á sunnudag. Lögreglumaður sem kom fyrstur á vettvang veiktist einnig alvarlega og liggur jafnframt á gjörgæslu. Hann er þó kominn til meðvitundnar og farinn að tjá sig við fjölskyldu sína. Honum hefur verið hampað sem hetju fyrir að koma feðgingunum til bjargar en hann vill sjálfur ekki sjá hetjutitilinn.
Yfir 250 lögreglumenn í hryðjuverkadeild lögreglunnar koma að rannsókn málsins sem Rudd segir mjög yfirgripsmikla. Sagði hún lögreglu nýta mikinn mannafla í að reyna að komast að því hver bæri ábyrgð á morðtilræðinu. „Rannsóknin er unnin hratt og af mikilli fagmennsku,“ sagði hún. „Lögð er áhersla á öryggi almennings og jafnframt er verið að safna sönnunargögnum svo við getum fundið út hver ber ábyrgðina. Það þarf að fara í gegnum mikið magn af upptökum úr öryggismyndavélum. Þetta er mikil nákvæmnisvinna og lögregla þarf að fá rými og tíma til að halda áfram með rannsókninni.“
Skripal var ákærður í Rússlandi fyrir að vera njósnari breskra stjórnvalda og var fangelsaður en síðar náðaður í heimalandinu eftir að skiptisamningar höfðu náðst við bresk yfirvöld.
Boris Johnson, utanríkisráðherra Breta, sagði í þinginu í vikunni að ef í ljós kæmi að erlent ríki bæri ábyrgð á atvikinu yrði tekið af því af hörku. Rússnesk stjórnvöld hafa neitað að tengjast málinu og segja að ásakanir um að þau standi að baki eitruninni séu settar fram í pólitískum tilgangi.