Armenska þingið greiddi í dag atkvæði gegn því að stjórnarandstöðuleiðtoginn Nikol Pashinyan yrði eftirmaður Serzh Sargsyan á stóli forsætisráðherra. 45 þingmenn voru því samþykkir því að Pashinyan yrði forsætisráðherra, en hann hefði þurft 53 atkvæði til þess að að tryggja sér meirihluta í þinginu.
Pashinyan hefur leitt öldu mótmæla í landinu upp á síðkastið, sem beinst hefur gegn Sargsyan og flokki hans, Lýðveldisflokknum. Sargsyan lét undan þrýstingi og sagði af sér í upphafi síðustu viku.
Stjórnarandstöðuleiðtoginn hvatti stuðningsmenn sína til borgaralegrar óhlýðni eftir að úrslit atkvæðagreiðslunnar lágu fyrir og vill að landsmenn fari í almennt verkfall á morgun og loki vegum, lestarsamgöngum og flugvöllum landsins.
Tugþúsundir mótmælenda eru á götum höfuðborgarinnar Jerevan og braust út mikil óánægja eftir að úrslit atkvæðagreiðslunnar voru kunngjörð.
Samkvæmt stjórnarskrá Armeníu þarf að boða til annarrar atkvæðagreiðslu um kjör forsætisráðherra í þinginu innan sjö daga. Ef að enginn verður fyrir valinu, þarf að leysa upp þingið.
Pashinyan hefur lýst því yfir að hann vilji boða til nýrra kosninga í Armeníu sem fyrst.